Meksika deyəndə ilk növbədə “Ölülər günü”, kalendula çiçəyi, yaxud da şokoladdan hazırlanmış kəllə sümüyü yada düşür. Sakit okeanın qumlu sahilləri, çılpaq qayaların üstündə özlərini günə verən suitilər, suyun altında “uçan” skat balıqları Meksikanın fərqli bir təbiətə malik olduğunu düşünməyə əsas verir. Bu ölkənin möhtəşəm məkanlarından olan Milli Antropologiya Muzeyi isə sirlərlə dolu kəşf olunmamış qədim bir adanı xatırladır. Meksikaya səyahət etmək istəyən turistlər üçün maraq doğura biləcək məkanlardan bir neçəsini təqdim edirəm.
Playa del Amor (Sevgi çimərliyi)
Kabo San Lukas dənizindən çox da aralı olmayan Sevgi çimərliyi turistlərin ziyarət etdiklkəri cənnət məkanlardan biridir. Los Kabos mirvarisi sayılan bu yer Sakit okeanın girişində Mar de Kortes sularının yuduğu sonuncu çimərlikdir. Sevgi çimərliyi turistləri dəniz həyatının sirlərini – sualtı macəra, müxtəlif balıq növləri və təsəvvürə gətirə bilmədiyiniz bitkilərlə zəngin təbii akvariumunu kəşf etməyə çağırır. Bir tərəfdə qayaların üstündə suitilər özlərini günə verir, insana əsla zərər yetirməyən skat balıqları isə suyun altında sanki uçurlar. Playa del Amor çimərliyinə giriş yalnız dənizdən mümkündür. Su taksiləri sizi münasib qiymətə o baş – bu başa çatdıra bilər.
Xanitzio adası
Patzkuaroya gəlişinizdə “Xanitzio” adlanan gölün ortasında qeyri-adi gözəlliyi ilə seçilən bir adanın ucaldığını görəcəksiz. Bu adanın sakinləri öz adət ənənlərini, geyim və dilini qoruduğu üçün ona “Möcüzələr kəndi” adı verilmişdir. Bu yerin ilkin adı Purepeça-Xanitzio, başqa sözlə, buğda və ya qarğıdalı çiçəyi mənasını daşıyır. Adaya çatmaq üçün Patzkuaro limanında qayığa minməli olacaqsınız. Tur təxminən 20 dəqiqə çəkir.
Holbox
Holbox öz cazibədarlığı ilə uşaqdan tutmuş, böyüyədək hamını heyran edir. Onun mülayim iqlimi, çılpaq təbiəti və insan ayağı dəyməyən qumu, günəşin altında rəngini dəyişib mavi sularına qərq olmaq istəyənlər üçün… təsvir etmək mümkün deyil. Başqa sözlə cansıxıcı həyatdan qurtulmaq istəyənlər Holboxa gəlir. Bu adada flora və faunanın ən nadir canlıları yaşayır. Aprel və oktyabr aylarında bura 400 mindən çox çəhrayı flamenko quşları köç edir. Holboxun suları delfin və balina köpəkbalıqları üçün bir sığınacaq, bəzi yırtıcılar üçün isə yaxşı ov yeridir.
Milli Antropologiya Muzeyi
Sizi Mərkəzi Amerika mədəniyyəti, onun bu günə qədər hifz olunmuş zəngin mirası maraqlandırır? O zaman Meksikanın Milli Antropologiya Muzeyi bu ölkəyə səfər etmək üçün yaxşı bəhanə ola bilər. Muzey 1964-cü il sentyabrın 17-də ölkənin aborigen keçmişini yaşatmaq məqsədilə açılıb. Burada ziyarətçilər üçün müxtəlif məşğuliyyət növləri var. Muzeyin zallarında nümayiş olunan eksponatlar zaman ardıcıllığı ilə düzülüb. Keçmişə səyahət muzeyin El Paraquas (çətir) adlanan həyətindən başlayır. Çətir turistləri günəşin yandırıcı şüalarından və yağmurdan qorumaq məqsədilə qurulub. Həyətdəki döyüşçü bəbir və qartalın heykəli, seiba ağacı və ispanların bu əraziləri fəth etməsini əks etdirən qılınc abidə ucalır.
Barranka del Kobre
Bu yerlərdə dağların əzəməti sizdə onun hər bir guşəsini kəşf etməyə istək yaradacaq. Zəngin florasına valeh olacaqsınız. Hər addımda şam, palıd, kaktus və qovaq ağacları ilə qarşılaşacaqsınız. Dağların arasındakı çuxurlarda çəkdirəcəyiniz fotoşəkillər sizə səyahət zamanı yaşadığınız ən gözəl xatirələri yada salacaq. Barranka del Kobre Çihuahua şəhərinin cənub-qərbində yerləşir. Siz bu gözəl yerləri iqlim çətinliklərini dəf edə bilən və bu əzəmətli dağ silsiləsinin yerli sakinləri raramurislərlə söhbət etməyi qaçırmayan bir macəraçı kimi kəşf edin.
Koyoakan
Meksikanın orta əsrlər İspaniyasının müstəmləkə torpaqları olduğunu bütün gözəlliklərilə yalnız Koyoakanda görə biləcəksiniz. Şəhərdən kifayət qədər uzaq məsafədə yerləşən bu ərazidə qədim küçələri, meydanları, alçaq evləri kəşf edəcəksiniz. Bu yerlərdə müasir göydələnlər, böyük şəhərlərdəki kimi sıxlıq yoxdur. Bu qəsəbəni ziyarət edərkən onun hər bir döngəsini, künc-bucağını gəzməyi, yerli mətbəxindən dadmaq fürsətini qaçırmayın. Meksikanın tanınmış rəssamı Frida Kalhonun ev muszeyi də burada yerləşir.
Pipila abidəsi
Quanaxuato şəhərində yerləşən bu abidə Pipilanın xatirəsinə ucaldılmış abidədir. Heykəltəraş Xuan Fernando Olaquibel abidəni çəhrayı daşlardan düzəldib. 1939-cu ildə abidənin açılışı olub. Bu ərazi ətrafı 360 dərəcədə seyr etmək üçün bir məntəqə kimi istifadə olunur və insanlara Quanaxuato şəhərinin gözəl mənzərəsini bəxş edir. Abidənin arxa tərəfindəki girişdən keçib yuxarı qalxmaq olar.
San Sebastian Bernal
San Sebastian Bernal müxtəlif rənglərə çalan və insanda xoş ovqat yaradan möcüzəli bir şəhərdir. Siz sakit və xoş bir havada qastronomiya və yerli sənətkarların əl işlərindən zövq alaraq ailənizlə birlikdə bir həftə sonu keçirə bilərsiniz. Bu şəhərdə Keretaronun ən tanınmış, məşhur Penya de Bernal adlanan turistik məkanları mövcuddur. Xatırladaq ki, burda hava quru olduğundan özünüzlə su ehtiyatı götürməyi unutmayın.
Real de Katorse
Başqa bir möcüzələr şəhəri San Luis Potosi ştatının mərkəzindən üç saat yarımlıq məsafədə yerləşən Real de Katorsedir. Bura mədənlər və səhra mənzərələrilə məşhurdur. Real de Katorse deyəndə, dağların arasında uzun bir tunel qazan, daşdan ucaldılmış şəhəri gümüşlə bəzəyən qədim bir xalqın qüdrətini əks etdirən yaşayış yeri yada düşür. Başqa sözlə bu, kabuslar şəhəri, vəhşi itlər və ölümünü gözləyən qocalarla dolu, top tərəfindən talan edilmiş başqa bir mədəniyyət nümunəsidir.
Tamul şəlaləsi
Tamul şəlaləsi Tamasopo ərazisində yerləşir və “Damcılayan yer” mənasını verir. Bura turistlərin ən çox axışdığı məkanlardan biridir. Bu heyrətamiz şəlalə Tamasopoda xırda qobulardan qidalanan Qayinas çayından tökülür. Şəlalədən sonra çayın adı dəyişilərək Tampaon adlanmağa başlayır. Şəlaləyə çatmaq üçün San Luis Potosi şossesi ilə getmək lazımdır. Tamul bu bölgədə olan ən böyük və möhtəşəm şəlalə sayılır. Burda suyun dərinliyi 300 metrə çatdığından təcrübəli turistlər rahatlıqla suya kəllə vurur, hətta xüsusi geyimdə sualtı mağaraları gəzirlər. Bir az da irəlidə, çayın sürətlə axan yerində üfürülmüş qayıqlarda daşların arasından dəlicəsinə sivişə-sivişə ləzzətli dəqiqələr yaşayırlar. Uasteca Potosinanın gözəlliyi ondadir ki, siz burda ürəyiniz istəyən əyləncə ilə məşğul ola bilərsiniz. Ərazi 105 metr hündürlükdə yerləşdiyindən siz burada kanata minib cəngəlliyin ortasında əsən mehdən həzz alaraq azadlığın dadını çıxara bilərsiz.
Discover more from Məmməd Məmmədli
Subscribe to get the latest posts sent to your email.